حوزہ نیوز ایجنسی کی رپورٹ کے مطابق،ہندوستان کی ریاست پنجاب کے شہر پٹیالہ اور علاقے سامانہ میں واقع روضہ حضرت مشہد علی میں عشرہ مجالس و روز عاشورا کی مجلس کو خطاب کرتے مولانا سید محمود حسن رضوی، چیف ایڈیٹر حوزہ نیوز ایجنسی اردو نے کہا کہ اللہ کے رسول حضرت محمد صلى الله عليہ و آلہ و سلم نے فرمایا کہ جو مجھ سے محبت کرتا ہے، وہ اہل بیت سے محبت کرے۔
انہوں نے مزید کہا کہ کربلا کا پیغام حق کا پیغام ہے، اسلام کا پیغام ہے۔ کربلا کے میدان میں جو جنگ ہوئی وہ اسلام اور کفر کی جنگ نہیں تھی، بلکہ وہ جنگ حق اور باطل کے درمیان تھی۔ یزید یہ بتانا چاہ رہا تھا کہ طاقت ہی سب کچھ ہے، طاقت ہی حق ہے لیکن حضرت امام حسین علیہ السلام نے یہ بتایا کہ طاقت کچھ نہیں حق ہی سب کچھ ہے۔
انہوں نے کہا کہ حضرت امام حسین نے اپنے اہل و عیال اور اپنی جان تک کو قربان کر کے یہ پیغام دیا کہ حق کے سامنے اور حق کے لیے اپنی جان کی قربانی دینا اسلام کا تقاضا رہا ہے۔ میدان کربلا میں حضرت امام حسین علیہ السلام نے حق کے پرچم کو بلند کرنے کے لیے اپنی جان کی قربانی دی لیکن کبھی باطل کے آگے سر نہیں جھکایا۔
مولانا سید محمود حسن رضوی نے ملت اسلامیہ سے اپیل کرتے ہوئے کہا کہ حق کے خاطر اسلام کی سربلندی کی خاطر اپنے آپ کو کوشاں رکھیں، ہمیشہ سرگرم رکھیں، حضرت امام حسین علیہ السلام نے جن کاموں کو پسند کیا وہ کام کریں اور جو کام یزید کرتا تھا، ان کاموں سے اپنے آپ کو دور رکھیں۔ حضرت امام حسین علیہ السلام سے سچی محبت کا تقاضا یہ ہے کہ حق پر ڈٹے رہیں، یہی امام حسین سے سچی محبت کی نشانی ہے۔
